شاهدیئے تَمبو
26
په شاهِدیئے تَمبوا دَه پرده اَڈّ کن.
اے پرده چه هورتگواپێن لیلُما و چه آسمانی و جَمو و سُهرێن پَژما گوَپَگ ببنت.
هُنرمندێن اِزمکارے اے پردهان کَرّوبیئے نَکش پِر بکنت.
2 سجّهێن پرده یکّێن کَدّ و ماپئے ببنت.
همُک پرده دْراجیا بیست و هشت دست ببیت و پْراهیا چار دست ببیت.
3 پنچ پرده بزور و گۆن یکدگرا لِچّێن و آ دگه پنچێنان هم همے پئیما لِچّێن.
4 ائولی رِدئے گُڈّی پردهئے لمبا آسمانرنگێن لۆپ پِر کن و دومی رِدئے گُڈّی پردهئے لمبا هم اَنچُش کن.
5 یکّ پردهێا پنجاه لۆپ پِر کن و دومی رِدئے پردهئے لمبا هم پنجاه لۆپ پِر کن.
دوێنانی لۆپ دێم په دێم ببنت.
6 تلاهئے پنجاه کَڑی اَڈّ کن و پردهان گۆن یکدگرا جۆڑێن که تَمبو یکّ ببیت.
7 په تَمبوئے پۆشَگا چه سْیَهپَسئے مودا پرده اَڈّ کن.
یازده پرده اَڈّ کن.
8 یازدهێن پرده یکّێن کَدّ و ماپئے ببنت.
همُک پردهئے دْراجی سی دَست ببیت و پْراهی چار دَست.
9 پنچ پرده یکّ رِدێا گۆن یکدگرا لِچّێن و آ دگه شَشێنان دگه رِدێا.
دومی رِدئے ششمی پردها تَمبوئے دێمی نێمگا دوتَلا پَتا.
10 ائولی رِدئے گُڈّی پردهئے لمبا پنجاه لۆپ پِر کن و دومی رِدئے گُڈّی پردهئے لمبا هم پنجاه لۆپ پِر کن.
11 بْرِنجئے پنجاه کَڑی اَڈّ کن و لۆپان مانِش کن که تَمبو بجُڑیت و یکّ ببیت.
12 تَمبوئے پردهانی پَشت کپتگێن بهر تَمبوئے سرا، پُشتی نێمگا لۆنجان ببیت.
13 تَمبوئے دْراجیا اے پرده که دوێن نێمگان چه تَمبوا یکّ دَست مستر اَنت، اے بِلّ دوێن نێمگان لۆنجان اَنت و تَمبوا پۆشنت.
14 تَمبوئے سربری پۆشا چه گوَرانڈئے اَنچێن پۆستێا اَڈّ کن که رَجگ و سُهر کنگ بوتگ و اِشیئے سربرا دگه پئیمێن مُهرێن پۆستئے پۆشے پِر کن.
15 په تَمبوا چه چِگردئے دارا مِکّ کنگی تَهتَگ اَڈّ کن.
16 هر تَهتَگ دْراجیا دَه دَست ببیت و پْراهیا یکّ و نێم دَست.
17 همُک تَهتَگا دو زُبانُک پِر کن و اے زُبانُک دَپ مان دَپ ببنت.
تَمبوئے سجّهێن تَهتَگان همے پئیم کن.
18 په تَمبوئے جنوبی نێمگا بیست تَهتَگ اَڈّ کن.
19 نُگرهئے چِلّ بُنهِشت اَڈّ کن که تَهتَگانی چێرا دئیگ ببنت.
په همُک تَهتَگا دو بُنهِشت اَڈّ کن.
همُک زُبانُکئے چێرا یکّ بُنهِشتے دئیگ ببیت.
20 په تَمبوئے آ دگه نێمگا، بزان په تَمبوئے شمالی نێمگا هم بیست تَهتَگ اَڈّ کن.
21 په تَهتَگانی چێرا نگرهئے چلّ بُنهِشت اَڈّ کن، بزان دو بُنهِشت په هر تَهتَگا.
22 په تَمبوئے پُشتی بهرا، بزان رۆنِندی نێمگا شَش تَهتَگ اَڈّ کن و
23 په پُشتی بهرئے کُنڈان دو تَهتَگ اَڈّ کن.
24 دوێن کُنڈان، اے تَهتَگ چه جَهلا گۆن یَکدگرا بلِچّنت و برزا دپ مان دپ کنگ و یَکّێن کڑیئے تها مان کنگ ببنت.
دوێن کُنڈان اَنچۆ کن.
25 هشت تَهتَگ ببنت و نُگرهئے شانزده بُنهِشت، همُک تَهتَگئے چێرا دو بُنهِشت.
26 چه چِگردئے دارا گوَربَست* اَڈّ کن.
پنچ گوَربَست په تَمبوئے یکّ نێمگێئے تَهتَگان و
27 پنچ گوَربَست په آ دگه نێمگئے تَهتَگان و پنچ گوَربَست په رۆنِندی نێمگئے تَهتَگان، بزان په تَمبوئے پُشتی بهرئے تَهتَگان.
28 نیامی گوَربَست چه اے سر تان آ دگه سرا، تَهتَگان سکّ ببیت، تَهتَگانی نێم بُرزیا.
29 تَهتَگان گۆن تلاها سرپۆش کن و په گوَربَستانی دارگا تِلاهئے کَڑی اَڈّ کن.
گوَربَستان هم گۆن تلاها سرپۆش کن.
30 تَمبوا هما پئیما مِکّ کن که من کۆهئے سرا ترا پێش داشت.
31 چه آسمانی و جَمو و سهرێن پَژما و چه هورتگواپێن لیلُما پردهے اَڈّ کن و هُنرمندێن اِزمکارے اِشیئے سرا کَرّوبیئے نَکش اَڈّ بکنت.
32 پردها گۆن تلاهئے کَڑیان چار چِگردی مِنُکئے سرا دْرنج.
اے مِنُک گۆن تلاها سرپۆش کنگ ببنت و نُگرهئے چار بُنهِشتئے سرا مِکّ ببنت.
33 پردها کَڑیان مان کن و دْرنج و شاهِدیئے پێتیا پردهئے پُشتا اێر کن.
پرده پاکێن جاگها چه پاکترێن جاگها جتا کنت.
34 کَپارَتئے سرپۆشا پاکترێن جاگها اێرێن شاهِدیئے پێتیئے سرا دئے.
35 ٹێبَلا چه پردها ڈنّ، شمالی نێمگا اێر کن و چِراگدانا ٹێبَلئے دێم په دێما، جنوبی نێمگا اێر کن.
36 آسمانی و جَمو و سهرێن پَژم و هورتگواپێن لیلُم بزور و په تَمبوئے دپا رَنگگواپێن پردهے اَڈّ کن.
37 په اے پردها چه چِگردا پنچ مِنُک اَڈّ کن و گۆن تلاها سرپۆشِش کن.
اِشانی کَڑی تلاهئے ببنت و په اِشان پنچ بْرِنجێن بُنهِشت هم اَڈّ کن.